Programa Moratóriu ba Kréditu

Programa Moratóriu de-Kréditu nu'udar inisiativa ida husi Governu Timór-Leste hodi tulun individuu no negósiu sira ne'ebé afetadu husi surtu COVID-19. 

Programa ida-ne'e jere no administra husi Banco Central de Timor-Leste. Programa ida-ne'e LA'ÓS MANDATÓRIU ba banku sira tanba banku balu iha ninia programa moratóriu própriu ba sira-nia kliente.  

Individuu no negósiu sira ne'ebé hakarak asesu ba Programa ida-ne'e TENKE aprezenta sira-nia pedidu liuhusi Aplikasaun Eletróniku ne'ebé bele asesu iha link indika iha kraikBanku sira sei la aseita aplikasaun ne'ebé aprezenta iha forma seluk.

Informasaun detallu bele asesu iha parte Pergunta Frekuente iha kraik maibé karik maluk vizitór sira balu ne'ebé hakarak hatene informasaun adisionál ruma mak lada'uk eziste iha kada portál halo favór kontaktu mai Banku Sentrál liuhusi email: cgs_unit@bancocentral.tl.

Pergunta Frekuente

Saida mak Programa Moratóriu ba Kréditu?


Programa Moratóriu ba Kréditu Governo Timór-Leste introdús liuhusi Dekretu-Lei Nú 22/2020 loron 5 Juñu sobre Moratória no Cumprimento de Obrigações Emergentes de Contratos de Concessão de Crédito no Âmbito da Política Económica de Resposta ao COVID-19. Programa ida-ne'e sei permite banku ka krédor sira konjela tiha pagamentu ba pretasaun (tagihan) prinsipál durante fulan tolu hahú husi loron 1 Agostu to'o 31 Outubru 2020. Kliente sira kontinua selu parsela juru (bunga) mensál 40% husi funan ne'ebé sira selu mensalmente.




Oinsá kriteria sobre elijibilidade?


Programa Moratóriu ba Kréditu aplika de'it ba kréditu sira ne'ebé ejiste ona molok loron 1 Marsu 2020 no ninia ninia situasaun ladauk klasifika hanesan kréditu mal-paradu (atrazu iha pagamentu liu loron 60) tuir informasaun ne'ebé rejista ona iha Sistema Kréditu nian iha Banku Sentrál (CRIS). Benefisiáriu husi Programa ida-ne'e mak:

  • ema ho nasionalidade Timorense;
  • entidade naun-governamentál ho sede iha Timór-Leste;
  • negosiante individuál ne'ebé rejista ona;
  • Empreza sira ne'ebé rejista ona tuir lei Timór nian maibé esklui empreza sira ne'ebé hala'o atividade iha setór telekomunikasaun, indústria estrativu no servisu finanseira;
  • laiha situasaun inkumprimentu ba obrigasaun kona-ba selu impostu no kontribuisaun seguransa sosial nian.




Oinsá asesu ba Programa Moratóriu ba Kréditu?


Mutuáriu sira ne'ebé hakarak asesu ba Programa ida-ne'e TENKE aprezenta sira-nia rekerimentu ba banku ne'ebé sira iha kréditu ba no uza formuláriu aplikasaun ne'ebé Banku Sentrál dezenvolve ona.

Favór nota katak ba mutuáriu individuál sira TENKE uza de'it Formuláriu ba Aplikante Individuál. Mutuáriu sira ne'ebé hanesan empreza ka ONG/NGO sira halo favór uza Formuláriu Aplikasaun ba Empreza nian.

Importante atu nota mak aplikante sira tenke prepara uluk informasaun prinsipál sira ne'ebé ejize hanesan númeru kontratu de-kréditu, númeru konta de-kréditu.




Informasaun importante saida de'it mak aplikante tenke prepara?


Aplikante sira tenke iha enderesu email ida tanba komunikasaun hotu (notifikasaun sira) sei halo liuhusi email mutuáriu nian. Karik mutuáriu sira ne'ebé ladauk iha email (liuliu sira ne'ebé iha área rurál) bele kontaktu banku ka ODTI sira hodi hetan tulun.

Hanesan temi ona, mutuáriu sira tenke iha informasaun sobre sira-nia kréditu hanesan; númeru kontratu, númeru konta de-kréditu, númeru konta depózitu, motante de-kréditu, data maturidade.

Banku Sentrál permite banku sira, liuliu instituisaun ODTI - SFMR no KIF - atu ajuda sira-nia kliente hodi prenxe formuláriu aplikasaun.




Programa ida-ne'e hanesan garantia husi Governu ka la'e?


LA'E! Programa ida-ne'e la'ós forma garantia ida ba ita-boot sira nia kréditu. Ita-boot sira nia obrigasaun sei kontinua nafatin no hafoin programa ida-ne'e termina ita-boot sira hahú selu hikas fali ita-boot sira nia obrigasaun hanesan normal.





  • Facebook
  • Twitter
  • Instagram

Avizu Legál  |  Termu ba Uzu

©  2020  -  Banco Central de Timor-Leste